第一次做伴娘

星期日那天是好友A的結婚大日子，亦是我第一次做伴娘。 

我這個朋友本身就是個事事親力親為，有主見的人，所以整個婚禮都是由她一手包辦，連接新娘遊戲，由構思到買道具都是由她負責!  我們一班伴娘&姊妹反而只要顧掂自己就得。 (花球、襟花 & 手花都是她自製，好厲害呀!)

婚禮前一天，我就要去新娘屋企過夜，我諗現在都好少會有伴娘陪過夜吧!

新娘一早已經assign我同時負責keep金器&賀禮，其實我一直都好擔心會分身不暇，因為我未見過會由伴娘一手包辦，但其他人又覺得非我莫屬。  結果就是要自己二選一，拎金器袋時就要其他人榜住新娘，照顧新娘時，就要找人睇住個袋。  所以我絕對認為，金器應該由另一個人負責keep!!! 

新娘身為我的好朋友，當然為我的幸福着想，一早已經內定要我接花球，haha，其實我好驚接的時候會”扒街”，好瘀架嘛!

我一早都估到那天一定會被新娘搞喊，結果當新娘一開口多謝爸爸媽媽，佢開始喊，我又跟住喊。  如果唔係知道唔可以失禮人，一定會喊到決堤咁!  (搞到要新郎安慰我!)

好多朋友都怕我會雞手鴨腳 (果然我在大家心目中是如此唔掂當，haha)，幸好過程中都沒什麼問題，最多都只是有少少甩漏(e.g. 帶漏紙巾)。 

至於我今次的化妝 & set頭就絕對比上次好好多，上次的髮型真係每次講起我都火起 (我說自己似cosplay雪山飛狐)，甚至有朋友問我有否set頭!  搞到我O晒咀!  雖然我個樣生得比較細個，當時又係齊蔭，但都可以set得好d啫!  所以之後就決定把瀏海留長，雖然唔係長咗好多，但今次真係set得幾好，個個都讚!  (雖然係伴娘，但都要靚架嘛!)  不過，竟然有舊同學認唔到化妝後的我，最搞笑係回家時連媽媽都認唔到，佢打開門見到我之後，竟然想關門!!!  嚇到我即刻出聲阻止。 (我冇帶鎖匙)

人家話伴娘是個油水位，敬茶時會有額外利是收，不過我就沒什麼着數，基本上敬茶時已經有其他親戚爭住做，而且我都唔覺得有親戚會額外俾利是。 

其實伴娘是個吃力不討好的位，即辛苦位，照顧周到是應該的，照顧不周就一定被會人(主要是親戚)話。  所以有人話會找同自己有仇的人當伴娘。  但是沒可能吧!  伴娘有如貼身丫環，找仇人來做容乜易會出事。  還是應該找好friend好friend的朋友做，只有好朋友才不會怕蝕底，又低得諗，任勞任怨。

另外，揀攝影師都好重要，除了相影得好，仲要態度好，又識指點人點擺post。  我見過幾個婚禮攝影師都好識講嘢，基乎做埋大襟姐。  但今次這個攝影師就唔多出聲，敬茶時冇叫人望鏡頭定一定影張相，新郎企到”pair”晒又冇提點下…  可能因為佢唔係專做婚禮攝影啩!  (姊妹A結婚時就曾經因為攝影師的態度差，而差點爆粗鬧人) 

還有，如果要係開席前穿裙褂向親戚敬茶，就最好請親戚早點到，因為通常新娘在開席前要換兩次衫，一套for席前(晚裝)，一套for進場(婚紗)，化妝師要幫新娘轉兩次妝，如果再換多套裙褂，就要轉多一次妝，化妝師得一個人，顧完新娘，又要顧奶奶、媽媽 & 伴娘，會怕唔夠時間。  另外，又要戴 & 除金器，新娘本身的妝扮都幾花時間，會變咗影好多穿裙褂的相，席前那套就會比較少。 

還有如果伴娘眼細(好似我咁)，想貼假眼睫毛，最好之前同化妝師講，問下佢包唔包假眼睫毛 (新娘就一定包，但伴娘就未必)，如果唔包就要自己準備好，到時俾佢幫你整。  貼咗假眼睫毛，對眼真係大d，精神d呢!

婚禮第二天當然請假啦!  今日才上班，但到現在仍然頸、肩、背、腳痛!  現在深深感受到好友E為什麼會說唔係好friend的朋友都唔好做伴娘。  當然還有不可以做多過3次伴娘，但是年尾又要當伴娘，只餘下一個quota呢!

haha，這篇文好似講籌備婚禮的心得多過講感想!

p.s. 在紅棉道婚姻註冊處聽到”ETERNAL FLAME”，即刻想起”LOVE SHUFFLE”! (睇上腦啦!)