加勒比海盜 魔盜王終極之戰

星期日去了看早場。

今集jack的戲份少了(反而布沙船長的戲份仲多)。  但佢一出場就好搶鏡，而且仲有幾場獨腳戰。 佢個人已經夠神經質，仲要加上有精神分裂(有好多個jack出現，個個神情不同)，真係好搞笑! 

will的戲份比較少。 當鄧爸爸知道個仔冇可能為咗佢而放款elisabeth時，我都替佢難過呢!

而elisabeth就係整部戲的主線(係佢話要救jack，又係佢主張要跟打東印度公司)，周旋係一眾男角之中。 一直以來話女人上船唔吉利，但偏偏俾佢做埋海盜之王，領導群雄，所以話佢係女海神都好貼切。 (不過佢又係劏豬凳，每個同佢kiss的男人都會遇上不測)  佢最後冇做海盜、專心湊仔(好似)，真係有d可惜。

至於發哥的角色其實都幾重要，有地圖，同jack係死對頭，又出賣同行，又鍾意elisabeth。 所以我覺得可以俾多d戲佢，深入d描寫，俾佢多d發揮。 依家佢實在死得太快，出場又少，似客串多d，難怪外國影評話佢的角色可有可無，其實唔係囉!

另外，片中那個大奸角，導演都算待佢不薄，係佢臨死前，solo慢鏡咁行落樓梯，d碎片就係佢身邊慢慢飛來飛去，個銀幕成10秒都只係影佢一個，都算死得有價值。

原來那個神婆的真身係女海神，真係有d意外。 但咁就解釋到好多疑問，令戲情make sense好多。

整體來說，我覺得比蜘蛛俠3更好睇(淨係睇johnny depp一個都值得)，雖然大家的文戲都多，但蜘蛛俠3就比較悶d。

有傳聞話會拍前傳，我覺得只要故仔好的話，都冇所謂，不過就會冇咗will & elisabeth，但就有發哥。

另外，好奇怪，d人一出roller就走，只係得廿幾人留係度等，佢地冇理由唔知roller之後仲有嘢睇啩?  唔通係因為知道嗰10秒其實都冇乜特別好睇?  (只係見到10年後冇變過樣的elisabeth同個細路仔等個樣都冇變過的will上岸)