地球停轉日: 可以拍得更好

"地球停轉日" - 年尾大片，科幻特技，加上奇洛李維斯，是今期必睇的戲。  不過睇完之後，平心而論，覺得唔可以話好好睇囉!  故事本身唔錯，演員亦很好，那應該是導演的問題!?

故事: 奇洛演的外星人因為見人類破壞地球，令它步向滅亡，所以要來消滅人類以保住地球。  最後女科學家 & 她的繼子令奇洛明白人間有情(?)，人會改變(今年最hit詞語)，所以令他放棄消滅計劃。

我覺得最大的問題係奇洛/本片的目的是要人類保護地球(環保)，但最後除了女科學家外冇人知道這個目的，全世界的人都只係以為外星人來侵略，所以就算奇洛決定給人類多一次改過的機會，其他人依然會繼續破壞地球。  最好就是奇洛留下一些訊息讓人類知道他的目的。

另外，奇洛感覺到人間有情的一段亦拍得唔夠深刻/深入/明顯，反而觀眾的重點會放在女科學家跟繼子的關係上面。 感覺好似只係因為諾貝爾獎得主那番說話，所以才說服到奇洛。  應該把奇洛跟繼子的相處着墨多點吧!  其實我覺得那個繼子好煩，明明好反叛，但突然又會跟繼母(女科學家)和好，感覺好突然。

不過，本片都有可取之處，除了特技好睇之外，我都好buy它反諷美國的意思。  美國成日持住自己是世界強國，當有外星人出現，就一定以為它們是來侵略，人家都未有行動就先開槍，自動放棄和解機會 & 主動挑起戰爭 (e.g. 攻打伊拉克)。 又阻止奇洛跟各國元首會面，兼唔俾其他國家參與，明明是全人類的事，卻完全當成是自己的事。  到最後冇晒辦法的時候先去尋求和解，真係完全反映現實。  結果那些前線的士兵就是最無辜的人，白白犧牲。  其實近來好多美國電影都有這個意思(e.g. 明日之後)，宣揚大美國主義的電影(e.g. 天煞-地球反擊戰)已經好少。

另外，internet的威力都有提及，政府不用自己去找資料，所有事都可以在互聯網上找到。

最後，一定要講: 奇洛好型!!!  雖然被人說他木無表情，但因為他本身是外星人，無表情是正常吧!  還有他在片中講國語呀!!!  初初以為係配音，但之後發現原來係佢自己講!  講真唔睇字幕都唔知佢講乜，但奇怪在連那個中國演員講的對白都有點聽唔明呢!