交響情人夢 睇完!

終於都係tvb播之前睇完啦!  實在太好睇啦! 

其實直至R☆S第一次公演為止，我都覺得故事是以千秋為主，不過，由催眠開始，野田妹就當主角。  看到野田妹小時候被那個變態老師體罰，真是睇得好心痛呢!  幸好她長大之後，沒有什麼精神病。 另外，那個悠人都好變態，竟然係比賽時坐係野田妹面前，咁都得咩!  還有，那個突然出現的變態小提手(好似小池澈平)是誰啊?  我覺得他的作用只是用來搞笑 & 幫峰提升好感度!  野田妹的家人都好好笑，果然有點樣的父母，就有點樣的孩子!

其實不只主要角色，連冇乜對白的茄喱啡都演得很好，很投入。 最厲害係演奏部份，他們應該不懂樂器，但全部都做得似模似樣，呃得到人。  (尤其是野田妹 & 千秋彈雙鋼琴版的鋼琴協奏曲，聽 & 睇得好感動!)

我好喜歡千秋反白眼，好好笑。 野田妹比賽失敗，千秋叫她跟他一同去歐洲，那不就是表白啊!!!  但野田妹竟然完全察覺唔到!  好彩，峰明察秋毫(but佢點知?)，為千秋製造機會去找野田妹。 河邊那幕好浪漫啊!!!  (千秋從後濫住野田妹，再加埋個日落...)  佢個句"如果再拒絕本少爺，就絕對不會原諒你"，cool得嚟，又好sweet呀!  其實佢都講到出晒面，點解仲係唔肯認係鍾意野田妹呢!  口不對心!

講浪漫，峰都唔輸蝕，當住咁多人面前，叫清良放心去外國留學，完全明白清良的心情，這個男朋友，有著跟外表不符的細心，難怪一副大家閨秀的清良會喜歡他。 (但千秋竟然唔察覺?)  不過，清良的離開，就好似表示他們要分手呢!  他們以後會點呢?  雖然我覺得峰係會等清良回來，但清良學有所成的時候，他們的距離就會越來越遠呢! 

另外，及川光博演的佐久間都好好笑，好突出，完全諗唔到及川會演咁搞笑的角色，仲要真係好夾呢!

我一直都覺得日劇版峰造型較漫畫的好，可能跟瑛太有關! (因為我都喜歡瑛太)  至於水川，我覺得如果由她來演 honey & clover的山田就最好呢!

漫畫我現在看到第6本，但我完全覺得日劇好睇好多，起碼那些樂曲，我可以聽得到，感受得到，漫畫只靠文字形容，令人很難想像(投入)呢!  所以我好想佢有續集呢!  現在就一邊睇漫畫，一邊等新年播特別篇!

還有，我好期待tvb的配音版呢!  究竟米奇那獨特的口音會配成點呢?  今個星期日就知啦!

btw, 睇到tvb的交響情人夢廣告，雖然有李雲迪彃鋼琴，但我完全唔覺個廣告同套劇match囉!  都唔知佢想表達d乜!   而且李雲迪肥咗好多，唔係見到有佢個名，我都估唔到係佢!