魔間傳奇 : 睇睇下驚到走咗出去

昨天跟好友E去看"魔間傳奇"。 其實一直都冇當過佢係喪屍片，不過因為同事話都幾嚇人&恐怖，所以搞到唔敢去睇，想搵人要咗張飛。 雖然之前一日，好友M睇咗之後話都唔係"好"恐怖，係有少少嚇人，但我都仲係好驚。 我真係好驚睇恐怖片、鬼片...，血肉橫飛個d戲我係唔會睇。

不過買咗飛冇辦法，唯有照去。 開頭都冇乜嘢，不過一去到隻狗走咗入黑麻麻的大廈之後，我就一支箭咁走咗出戲院，因為之前同事講過個度會有喪屍出現。 之後我又返入戲院，直到男主角中陷阱，天又就快黑，知道就嚟有喪屍出現，我就同emily講"好驚呀，我都係出出去"。 出咗去之後，就call 好友M不停問個段之後仲有冇恐怖位，又不時係門口塊布度偷望吓，個陣套戲剩返半小時。 好友M話係最後係間屋入面有d驚之外都冇乜嘢。 咁我之後就入返戲院，實在冇可能掉底個friend唔理。 結果睇到最後我都唔覺好驚!   我咁樣又出又入都幾驚俾附近的人話，而且更加驚好友E會嬲，不過佢只係話我好無聊。

其實依家諗返套戲都唔係好恐怖，只不過因為之前有人咁講，加上係喪屍出現前的"有事會發生"的氣氛令我先入為主覺得會好驚，所以先至受唔到個種壓迫感。  如果之前咩都唔知可能會好d。 而且d喪屍都唔係似"28周後"咁核凸，而係似"魔戒"的咕嚕 or "魔盜王"的鬼船員 or "盜墓迷城"的大祭司個d咁，所以大屋個幕一d都唔驚。 不過我冇睇的部份，除咗隻狗死個幕外，其他都冇乜損失。

套戲節奏算明快順暢，緊張之餘又有笑位(will對住model公仔面紅、同隻狗講數 & 背史力加對白都好好笑)。但最唔明係: 原來有個好大的收容中心係山上，咁點解佢地唔學will smith用廣播通知其他生還者去搵佢地?  而且佢地的設備都唔差，點解唔可以自行研製解藥，要靠will smith?  另外對於事發時的描寫略嫌不足。

演員方面，全套戲基本上係will smith的獨腳戲，佢表面上好正常，但實質精神上有d問題，如果唔係因為要研究解藥，我諗佢可能已經自殺了。  另外估唔到愛瑪湯遜有份客串，演那個罪魁禍首的科學家。

我覺得套戲是有d宗教意味，will認為上帝放棄了人類，反而女生還者認為是上帝給人類的考驗。 好似挪亞方舟咁，因為人類犯了大罪，上帝要以洪水滅世，只有挪亞一家人生存。  戲中，就係因為人類意圖治好癌症改變DNA因而製造出恐怖病毒直接令人類滅亡，而生還者就是被上帝選中的挪亞。 所以依家人類試圖去改變植物基因、複製人類...等違反大自然的定律的行為，到最後是否真的能為人類帶來幸福?  我想真是要想清楚。