2008 台北之行(1)

回來已兩個多星期，係時候要寫下遊記了。

今次旅行的重點是”悠閒”，行程完全不緊密，最後一日仲可以係西門町hea!  (因為我們都是無所謂的人)  而且可能舊年先遊過台北，對某些已去過的地方/食過的食物沒有很大的興趣，e.g. 吃不到度小月也不感到可惜，所以今次整體上唔係影咗好多相。

- 擔心行李超重

去程check-in時發現，原來我個大喼重10kg，即20kg的寄倉限額，我已用了一半!!!  因此搞到我個幾日為了怕超重而唔夠亂買嘢。  但點計我都一定會超重，都諗住可能要俾charge(約HKD800)，但回程時又冇事。  原來係因為我們二人的寄倉行李總重量沒有over，早知就放埋本書落下啦!

- 千萬不要搭”飛狗”

如果唔係因為買package送一程飛狗巴士，我一定唔會搭。 1) 車少; 2) 站員安排不當，明明我們是排隊頭，但之後變了隊尾，結果等了>1小時才上到巴士出市區; 3) 架車好殘，最後排坐位上那個頭部cushion，原意應該是好似過山車咁保護頭部，但結果是撞到我個頭好痛，搞到我要傾前坐; 4) 偏偏係最大風大雨的時候，要我們轉車(我睇住前面個人反遮)，行李又要自己去拎，搞到成身濕晒，轉的車是普通公車，要我拎住大喼上4級樓梯，架車又漏水，唯一值得慶幸的是係停正酒店門口。 

seatback tv有部份是壞的

這個令人頭痛的cushion

- 酒店好正

今次住的天成酒店地理位置非常好，台北捷運站一出行2分鐘就到，又不用過馬路& 一條直路就去到國光車站。  我們可以買完嘢返酒店放底，再出去。 房間不錯，可以揀兩張單人床。 服務不錯。 唯一要彈的是只有一個國際長途電話 & 自助早餐只有即叫即整的炒蛋/蛋卷好吃。

酒店正門，冇影酒店房(因為唔鍾意影)

附設雪糕店，但住客都只有8折 (冇食到)

台北捷運站3號出口

- 用悠遊卡搭捷運有折

於8月31日前，用悠遊卡(即香港的八達通)搭台北捷運有75折。  其實買悠遊卡都只是貪方便，唔洗搵散紙，出閘後先知原來有折。 部份公車都可以用悠遊卡，咁竟唔洗問司機車費，再搵散紙，咁麻煩!

- 全程都是貓

想買貓的東西? 問我啦!  因為emily是超級貓痴，所以去了很多貓物的店舖(我們可以為了一間舖頭而去圓山)。 我強烈建議sanrio推出國際會員卡，反正hello kitty在世界各地都有fans!

- 落雨好狼狽

除了剛到達時落大雨外，回港那天都落雨(係一拿行李出酒店就落)。 因為行李太，所以唔方便擔遮，幸好有位好心的太太用她的遮替我遮了一陣雨。  (太好人了!)  然後就是返到香港一落機場巴士就落雨。  幸好中間兩日好好天!

看到車後的水花嗎?

- 熱到無胃口

但天氣太好太熱了，搞到冇胃口，無食到九份的美食。  另外，emily怕熱、怕人多 & 腸胃唔好，所以係士林夜市只食了一塊雞扒，連水都只可以買香港出的屈臣氏。

- 令人氣憤的香港的士司機

我手拿3大袋+一個大喼，當然係揀搭的士回家啦!  但我企係的士站前，個的士司機係架黑麻麻的車入面口郁郁，佢又郁，架車又唔郁，我都唔知佢想點，我以為佢唔想車我，所以我讓咗俾其他人上。  跟住後面架的士的司機初初又係咁，但之後就有落車，不過就係話我企係度唔郁令人以為我等緊人，又話之前個司機已經打開車尾箱俾我放行李。  嘩!  個車尾箱搵條”啦”都冇就話開咗!  仲要我自己放行李!!!  拎到的話，我都唔洗搭的士啦!  個司機仲話自己唔夠力，要我一齊搬!  咁大隻的男人都無力，我一個女仔無理由大力過佢啩!  之後朋友話依家的的士司機係咁!  吓!  我少去旅行，少搭的士，真係唔知原來依家的的士佬咁”驚貴”!