終於轉髮型

等咗半年終於都可以去整下個髮型。 自從6個月前電髮之後，個頭越來越唔掂，又唔攣又唔直，日日都一定要束髮，但一札起條辮，前面睇個樣又勁似男仔。 次次見到friend都問點算好。 唯一辦法係去整負離子。 (因為睇返以前d相，都係直頭髮好睇)
尋日終於都可以去整負離子啦!  其實個陣間salon都唔算好多人，但我就係咁走來走去坐唔同既位，不過我都唔介意。 但係幫我整頭個女仔(唔係髮型師)就真係好唔得。 洗完頭梳頭，d頭髮打"kick"，就係咁用把梳扯佢; 吹頭時，個風筒又吹到埋一埋。 之後第二次吹頭，吹咗都冇一半就走咗，等咗都幾耐下之後，第二個人黎吹，但一陣間佢又走咗去; 到第三個人黎幫我吹頭，吹得好地地，個女仔又走返黎攞返我個頭黎吹!  跟住仲離譜，揸part two個陣，揸咗一半又走咗去。 到夾頭髮個陣又係夾夾下走咗去。  夾個陣又四圍望，好唔專心，搞到我全程口黑面黑，連好友M都睇得出我個樣勁妥。 我同好友M同一時間整，但佢快我45mins完成。唔知點解次次整頭髮都會遇到不愉快的事。 (不過髮型師就好似幾pro，但只係最後才出場幫我修下d瀏海)
間salon係元朗，之所以去到咁遠，純粹因為個舊同事極力推介，價錢都算平($320包洗剪吹)，最重要係話好多人幫襯過話好，不過我暫時仲未知效果(而且我d頭髮長得真係好慢，依家只係過咗肩膀少少，都預咗會有少少翹起)。 我想都未必會再去。 
今日返公司，個個同事一見到我個頭就笑。 因為之前剪碎 & 剪簿咗d頭髮，所以整完之後d頭髮好貼，搞到個頭好細。   不過，佢地都話好睇咗!   (梗係啦! 之前個髮型真係好唔掂麻!)